HAPO planaren ildoa gorabehera, EH Bilduk uste du Lasarte-Oriako Udalak "asko" egin dezakeela herriko etxebizitzaren egoera hobetzeko eta sei neurri zehatz hartzea eskatu dio: azterketa edo diagnostiko "zorrotz" bat egin dezala; tasatutako etxebizitzen prezioa jaitsi dezala (1,88ko indizea onartuta, 75 metro koadroko etxebizitza batek 312.000 euro balio ditu Lasarte-Orian, BEZa aparte); hutsik dauden bizitokiei Ondasun Higiezinen Zergan errekargu eta kanonak aplika ditzala; etxe zahar hutsak berritzeko dirulaguntzak eman ditzala; Kotxeraseko eremuan babes ofizialeko etxebizitzak eraiki ditzala lehen fasean; eta has ditzala Lasarte-Oria eremu tentsionatu izendatzeko tramiteak.
EH Bilduk jakinarazi duenez, gure herrian 674 etxebizitza daude hutsik gaur-gaurkoz eta horiek erabiltzeko "neurri desberdinak" aplika ditzake udalak.