Osasun Publikoaren Aldeko Herri Plataformen Koordinakundearen ustez, hau guztia ez da kasualitatea. Osakidetzaren egungo egoera arduradun politikoek egindako plangintza eta kudeaketa politiko arduragabearen eta negatiboaren ondorioa da. Lobby sanitarioen interes merkantilei jarraituz, osasun-asistentzia pribatizatzeko politika kontziente bat eraman da. Horren adibidea da 15/97 Legea, erakunde pribatuak osasun-laguntzan sartzea ahalbidetu zuenak, egoera larriagotzen lagundu duena. Osasungintzaren pribatizazioa modu zuzenean gauza daiteke, gaixoak klinika pribatuetara edo kontzertatuetara desbideratuz, “peonaden” deitutakoen bitartez edota mutuen eskumenak zabalduz, gertatzen ari den moduan. Baina zeharka ere egin daiteke, lehen arreta ahulduz eta, horrela, baliabide ekonomiko nahikoak dituzten herritarrek aseguru pribatuetara jo dezaten. Eta hau ere ari da gertatzen, bigarren mailako osasun publikoa sektore ekonomiko ahulenentzat utziz.
Lehen Arretaren gainbeherak logika merkantil erantzuten dio argi eta oso garbi, osasuna merkantzia moduan ulertzen duena, ez eskubide moduan. Denok dakigu hobe dela prebenitzea sendatzea baino, dudarik gabe, baina… diru gehiago ematen du sendatzeak prebenitzea baino: botika kontsumo gehiago, analitika eta froga gehiago, espezialista kontsulta gehiago eta klinikako egonaldi gehiago. Esandakoa, etekin gehiago. Eta herritarra eskubide-subjektu izatetik bezero izatera pasatzen da.
Hau guztia kontutan hartuta, Osasun Publikoaren Alde Lasarte-Oriako Plataformatik bat egiten dugu datorren LARUNBATEAN, martxoak 16, Donostian, 17:00etan, Boulebarretik abiatuta, osasun publiko eta kalitatezkoaren alde egingo den manifestazioarekin, eta gonbidapena luzatzen diegu lasarteoriatar guztiei bertan parte hartzeko.
Bide batez, Osasun Publikoaren Alde herrian sortu berri den Plataforman parte hartzeko interesa dutenei gonbidatzen diegu datorren martxoak 21, osteguna, 18:00etan, Kultur Etxeko liburutegiaren ondoko 3. bilera gelan egingo den bilerara.