Sasoiko produktuak, maitasunez sutan kozinatuta errezeta erraz eta goxoak presta daitezkeela erakutsi nahi du Ane Galardi Fernandez de Agirre (Lasarte-Oria, 1997) sukaldari lasarteoriatarrak. Ez erakutsi bakarrik; jendea horiek egitera animatu dadin nahi du, eta horretarako, bitxi_sua Instagram kontuan jarri du martxan. Abiatu berri duen proiektu horretaz, eta beste hainbat kontuz mintzatu da TXINTXARRI aldizkariarekin.
Nolatan abiatu duzu Instagrameko 'bitxi_sua' proiektua?
BCC Basque Culinary Center-en egin ditut ikasketak eta egun, bertan ari naiz lanean. Nire egunerokotasunean, enpresei edo gure parte direnei sortzen dizkiet edukiak eta errezetak. Ingurukoak, nire ahizpa kasu, aspalditik zebiltzan Instagram kontu bat martxan jar nezan animatzen. Hortik abiatuta sortu dut bitxi_sua. Lehenagotik banuen nire profil pertsonala, baina ez nituen biak nahastu nahi; nire alde gastronomikoa erakusteko sortu dut hori.
Zure alde gastronomikoa erakusteaz gain, badu beste helbururik 'bitxi_sua-k'?
Nire helburua da jendeari egunero egin daitezkeen errezeta errazak erakustea; errutinazko plateretatik ateratzekoak egin daitezkeela erakutsi nahi dut. Egunerokotasunean kozinatzen dutenei edota hori egiteak nagitasun apur bat ematen dienei gauza goxo eta errazak egin daitezkeela ikusarazi nahi diet. Errezeta eskuragarriak, oinarrizko osagaiekin eginak, barazki askorekin… Ukitu berezi bat edukiko dutenak izango dira.
Sortzen dudan edukia nork jasoko duen ere argi izan behar da. Kontuan hartu behar da sare sozialetako target-a zein den; normalean, erabiltzaileak gazteak izaten dira.
Defendatzen duzu, beraz, eguneroko janari goxoak prestatzea erraza izan daitekeela.
Bai, esan bezala uste dut oinarrizko hiruzpalau osagairekin jaki oso goxoak egin daitezkeela, eta betiko plater tipikoez gain beste hainbat egin ditzakegu. Noski, beti, sasoiko produktuei duten garrantzia eman eta horiek erabiliaz.
Sasoiko produktuekin kozinatu eta horiek kontsumitzeari garrantzia ematen diozu, beraz.
Bai oso garrantzitsua da niretzat. Uste dut horien erabileraz kontzientziatu behar garela denok, bi aspektu nagusirengatik. Alde batetik, horiek direlako zaporez beteta dauden elikagaiak eta bertakoak direnak; inguruko ekoizle bati erosten badizkiogu, askoz hobe. Eta, bestalde, ekonomikoki beti izango direlako merkeagoak. Azken hori ere garrantzitsua da, uste baitut, gastronomia ere iritsi behar dela publiko guztietara.
Gauden sasoia kontuan hartuta, udaberrirako bidean, zeintzuk dira garai honetan kontsumitu ditzakegun produktuak?
Oraintxe bertan sasoian dauden barazkiak, adibidez, agian, nolabait esateko distira gutxi dutenak izan daitezke: aza, eskarola, letxuga, azalorea, brokolia, zerbak, ziazerbak. Frutei dagokienez, aldiz, zitrikoen denboraldia ere bada eta oso momentu ona da horiekin kozinatzeko.
Azalorea, adibidez, iruditzen zait, orokorrean, ez dela produktu oso gustagarria, baina egin daitezke errezeta eder pila bat; espezieekin labean, adibidez. Laster argitaratuko dut barazki horrekin egindako errezeta bat. Erakutsiko dut azalorea kanpoaldetik kurruskaria eta barrualdetik krematsua kozinatzen, eta jogurt saltsa batekin lagunduko dut. Azken horri, gainera, gehi dakioke oliba olioa, gatza, pipermina, limoi zukua eta menda pixka bat. Dip gisa jateko errezeta eder bat da, azalore plater ohikoaren alderatuta zerbait bereziagoa izan daitekeena. Superelikagai bat izan daiteke azalorea.
"Nire helburua da jendeari egunero egin daitezkeen errezeta errazak erakustea"
Gaur gaurkoz zazpi errezeta argitaratu dituzu. Zein maiztasunekin erakutsi asmo dituzu horiek?
Asmoa da astean bizpahiru errezeta argitaratzea. Igande, astearte eta ostegunetan egingo dudala aurreikusi dut; igandeetakoa, adibidez, etorriko den astean ideiak edukitzeko. Saiatuko naiz maiztasun horri eusten.
Kontua izendatzeko erabili duzun izenak ere badu sukaldaritzarekin lotura. Euskarazko hitz joko polit bat egin duzu, gainera.
Buelta eta buelta ibili nintzen izenaren aukeraketarekin. Ez nuen sare soziala martxan jarri nahi, izena benetan gustuko nuela sentitu arte; identifikatuta sentiarazten ninduena izatea nahi nuen.
Vichyssoise-a da Frantziar jatorria duen porruekin egindako pure hotz bat. Eta gustatu zitzaidan, euskarara ekarrita Bitxi eta Sua-rekin egin zitekeen hitz jokoa: bitxia, zerbait ezberdina, bitxia erakusteko, eta sua, berriz, sukaldea sua delako.
Proiektu honetan ere hizkuntzarena garrantzitsua da niretzat. Euskaraz ere argitaratu nahi nuen eta horregatik egiten ditut argitalpenak bi hizkuntzatan. Iruditzen zait gastronomia euskaraz ere zabaldu behar dela; hutsune hori ikusten dut sare sozialetan.
Instagrameko proiektuaz gain, Lasarte-Orian oso ezagun eta kuttuna den elkarte batekin ere bazabiltza elkarlanean.
Bai. Julene [Illarramendi] eta Miren [Cuerdo] lagunak dira, herritarrak eta egiten dutena izugarria da; minbiziaren gaia lantzeko modua iraultzen ari dira. Iaz eskaini zidaten aukera eurek antolatutako erretiro batean sukaldari gisa aritzeko, eta ez nuen bi aldiz pentsatu. Aurten ere, dagoeneko bi egin ditugu.
Esan behar dut saio horietan aritu eta horien parte izatearen pribilegioa nirea dela; izugarri transmititzen didate eta asko ikasten dut. Horietan nire helburu eta lana da erretiroak iraun bitartean egingo dituzten saio guztietarako energia eman eta sabel eta barrenak goxatzea, noski, janariaren bitartez.
Saiatzen naiz janaria osasuntsua izan dadin, baina badago ezberdintasun bat osasuntsu eta dietetikoaren artean. Nire iritziz, janariak egin behar digu on bai mentalki eta baita animikoki ere.
Jakiak egon behar du goxoa, eta izan behar da osasuntsua. Ahalik eta produktu garbienak jan behar ditugu, hau da, ultra prozesatuak alde batera utziz. Beraz, Iñurrirekin ere bide horretatik egiten dut nire lana. Janari osasuntsua eta zaporez betetakoa prestatzen dut, beraiek ere ikus dezaten egin daitezkeela plater osasuntsu eta goxoak.
Gainera, eskaintzen dit aukera kozinatu dudan hori parte hartzaileek nola jaten duten ikusteko, eta prestatu diedan horrekiko dituzten erreakzioak behatzeko. Kozinatzen dudanean, maitasun osoz egiten dut, nire energia guztia jartzen dut egiten dudan errezeta bakoitzean.
Hitz egindako proiektuez gain, baduzu besterik eskuartean?
EiTB orain emititzen ari den Sukaldarien liga programan asesoria gastronomikoa egin dut. Programak egin ditu probak, eta diseinatu dinamikak, eta nire lana izan da proba horietako bakoitzean zein errezeta kozinatu beharko dituzten zehaztea. Atrezzokoarekin batera, ikus daitezkeen bodegoiak ere diseinatu ditugu. Asesoria gastronomikoa egitea izan da nire zeregina.