Joan den ikasturtean TrukeLandian parte hartu zuten kideetako batzuk ere joango dira aurkezpenera, bizi eta landu zutena kontatzera: errezetak, jolasak, ipuinak, abestiak... amaiezina da zerrenda. Honezkero parte hartu dutenek esango dutena adi entzuteaz gain, ekitaldira bertaratzen diren familiek primeran pasatzeko aukera izango dute festa kutsua izango duen ikuskizun horretan. Horretan lagunduko du, nola ez, Porrotx pailazoak: antolatzaileekin batera dinamizatuko du arratsaldea.
GurasoLekuren adarrak
TrukeLandia egitasmoa GurasoLandiaren baitan dago, eta, azken hori, GurasoLeku izeneko ekimen baten adarretako bat da, GurasoLagun eta GurasoTegirekin batera. Urte batzuk daramatza martxan xede honekin: herriko haurrak elebidun oso bihurtzea, euskararen transmisioa familietan bultzatzearen bidez. Lan mahai batek koordinatzen du hori guztia eta hauek dira kideak: Lasarte-Oriako Udaleko Euskara Zerbitzua, Ttakun Kutur Elkartea eta herriko ikastetxeak nahiz euskaltegiak.
Antolatzaileek jakinarazi dutenez, "berezia" izaten ari da ikasturtea, ehun familiatik gora parte hartzen ari direlako aurten GurasoLandian, bost programaziotan banatuta, 0 eta 5 urte artekoei zuzendutakoetan hain zuzen ere.
Gonbidapenak jaso
Lehen esan bezala aurten GurasoLandian ari direnek bertaratu ahalko dute TrukeLandiaren aurkezpenera. Ekitaldirako gonbidapenak hilaren 16an eta 17an jaso ahalko dituzte Ttakun KEren bulegoan (Geltoki kalea 4, behea), 09:00etatik 13:00etara eta 16:00etatik 18:00etara.
Egun eta ordu horietan bulegora joan ezin dutenek kultur etxera bertara joan beharko dute 18an, eta 17:00etatik aurrera jaso gonbidapenak. Ikuskizuna doakoa dela gogorarazi dute antolatzaileek.