Zarautz Beltzak RTko Lander Zabala eta Eneko Sanchez gazteak Euskadiko 16 urtez azpiko taldearekin lehiatu dira Erkidegoen arteko Espainiako txapelketan. Hilaren 4an, txapelketako lehen jardunaldia jokatu zen eta Euskal Erkidegoko konbinatuak Andaluziaren aurka neurtu zituen indarrak Bilbon. Euskadik 10-20 neurketa galdu zuen arren, herritarrek lan ederra egin zuten; Sanchezek taldeak lortutako bi entseguetako bat egin zuen.
Ordiziako kide den Alex Saleta herritarra, aldiz, Espainiako Castilla y Leon Iberians taldearekin lehiatuko da Europako Superkopako bigarren jardunaldian. Hitzordua hilaren 12an, 12:30ean da Valladoliden. Urri amaieran selekzioarekin lan egin ostean, Saletak Israelgo Tel Aviv Heat taldearen aurka jokatzeko deia jaso du.
Neurketa Michelinen
Bestalde, Euskal Ligako II. mailako Gesalaga Okelan Zarautz Beltzak taldea AVK Bera Bera Bren aurka lehiatuko da hilaren 11an, 17:30ean Michelin kirol gunean .
Egoitz Esnaolaren jokalariek ligan astebeteko atsedenaldia izan dute. Denbora tarte horretan UBR-Nerbioiren aurkako porrota ahaztu - 6-22 galdu zuten - eta hurrengo hitzorduak prestatzeko egin dute lan beltzek.