Bizikletak konpontzeko postuarekin ekingo diote bihar Mugikortasun Asteari

Txintxarri Aldizkaria 2023ko ira. 18a, 09:39
Bizikleten bigarren eskuko azoka hilaren 23an egingo dute, larunbatarekin.

Egitarau oparoa prestatu dute Lasarte-Oriako Udalak eta Artelatz enpresak Europako Mugikortasun Asterako, hau da, datorrenerako. Bizikletan ibiltzen ikasteko saioa, konpontzekoa, bigarren eskuko azoka, Muittu Manttangorri hiribusa doan... ekimen ugari aurrera eramango dituzte mugikortasun jasangarriaren beharra ikusarazteko.

Egitaraua

Hilak 19, asteartea

  • 16:00etatik 20:00etara, bizikletak konpondu eta ibiltzeko prestatzeko furgoneta ibiltari bat ekarriko dute Okendo plazara.

Hilak 20, asteazkena

  • 18:00etan, Okendo plazatik abiatuta, hirigunean barrena bizikletan ibiltzen ikasteko saio praktiko bat aurrera eramango dute. 18 urte baino gehiagoko herritarrek parte hartu ahalko dute, aurrez izena emanda.

Hilak 21, osteguna

  • 18:30ean, Okendo plazatik abiatuta, ipar martxa saio bat egingo dute, Ostadar SKTren taldearen eskutik.

Hilak 22, ostirala

  • Muittu Manttangorri hiribusa dohainik erabili ahalko dute lasarteoriatarrek, egun osoan zehar.

Hilak 23, larunbata

  • 10:00etan, Okendotik bizikleta martxa bat abiatuko da. Norberak bere ibilgailua eta kaskoa eraman beharko ditu.
  • 10:30etik 14:00etara, bigarren eskuko bizikleten azoka izango da Okendon.
  • 11:00etatik 13:30era, Okendon eta Kale Nagusian barrena, jolas ugari egingo dituzte: herri kirolak, bizikletan ibili bitartean egitekoak (zinta jokoa, trebetasuna...), eta abar.

Bigarren eskuko azokari buruz

Antolatzaileek jakinarazi dutenez, herritarrek 09:00etatik 10:30era eraman ahalko dituzte salgai jarri nahi dituzten ibilgailuak. Prezioek ezingo dute 500 eurokoak baino garestiagoak izan. Beharrezkoa izango da aurrez hitzordu bat finkatzea, www.merkabi.eus/lasarte-oria webgunean edo 943-67 02 49 telefono zenbakian izena emanda.

Parte hartu nahi dutenek 18 urte baino gehiago izan behar dituzte, eta bizikletak azokara eramaterakoan NAN nahiz telefono zenbakiak eman.

Agustin Valdivia alkateak eta Artelatzeko kide Eli Gondatek aurkeztu dute egitaraua.