Hilaren 7tik 9ra, Ehun Milak, G2 Handiak eta Marimurumendi maratoia jokatu dira Beasainen. Lasarte-Oria Trail Mendi elkarteko (LOTME) kideak izan dira horietako bietan lehian, Ehun Milak eta Marimurumendi. Angel Carreterok eta Xabier Mujikak 168 kilometrotako bidea hasi zuten arren, biek Elosuan aldean lasterketa uztea erabaki zuten. David Garciak eta Erik Martinenak, aldiz, maratoia aukeratu zuten; 05.06.31 eta 05.29.53 markak egin zituzten, hurrenez hurren, helmugara iristean.
Bestalde, hilaren 5etik 9ra Val d'Aran Pyrenees- UTMB proba lehiatu zen Lleidan, Herrialde Katalanak. Peades d'Aigua 55 kilometrotako proban Diego Cardanha kideak bederatzi ordu, 27 minutu eta 19 segundo behar izan zituen Vielhako helmugara iristeko.
Eta taldeko kide Alberto Calvok hilaren 2an II. Ortigosa Trail proba amaitu zuen, Ostigosa de los Cameros, Errioxan. 16 kilometrotako ibilbidea ordu eta 50 minutuetan egin zuen.