Birziklatzeari buruzko kanpaina balioan jarri du udalak eta eskerrak eman dizkie egunero hondakin guztiak "behar bezala" bereizten dituzten herritar eta establezimenduei. Era berean, barkamena eskatu du, zenbait etxebizitzatan arazoak izan dituztelako edukiontziak irekitzeko txartel elektronikoekin.
Maiatzeko datuak onak izanagatik, kanpainaren sustatzaileek nabarmendu dute "gehiago" nahi dutela. "Hondakin organikoak sortzen ditugun guztien %40 dira, eta horien herena baino ez ditugu bereiztuta biltzen. Hobetzeko asko dugu". Oraingoz, edukiontzi marroiak (organikoarenak) baino ez dauka sarraila, eta ez dute zehaztu errefusaren kontenedoreak noiz izango duen, nahiz eta aurreratu duten udaren ostean izango dela. Gauzak horrela, lasarteoriatarren parte hartzea bultzatzen segiko dute, gutxieneko birziklatze tasen konpromisoak betetzeko (%55 gutxienez 2025ean, eta, 2030ean, %60).
Norabide horretan, udalak zehaztu du "oinarrizko informazioa eta baliabideak" ematen jarraituko duela: poltsa konpostagarriak makinetan eta jarduera ekonomikoetarako nahiz elkarteetarako zorro handiak, udaletxean.