Aurtengo kurtsoko entseguak amaitu ditu Xumelak. Oriarte Landaberri eraikineko musika gelan bildu eta hurrengo asteetako emanaldiak prestatu dituzte. Oaintxe in deu! txarangako kideak ere bertaratu dira, elkarrekin kantu eta dantza jira egingo dutelako sanpedroetan, hilaren 29an, 11:30etik aurrera. Hamaiketakoa egingo dute aurretik, Sagardotegi kaletik abiatu, erdigunea zeharkatu eta Okendo plazara iristeko ordu eta erdi barru, 13:00etan.
Enparantza horretan zain izango dituzte Sorgin Jaiak-eko sorginak eta baita Bizipoza elkarteko lagunak ere, Bizipozaren Akelarrea ekimenean parte hartzeko. Porrotx eta Marimotots pailazoek ere parte hartuko dute, eta bertaratzen diren haur eta familiei eragile horrek egiten duen lana azalduko diete. Horrez gain, harri batzuetan Bizipozaren esanahia margotzeko aukera izango dute partaideek. Musikaz lagunduta, Euskararen 10. Maratoialdian landatu zituzten bi zuhaitzen albora joan eta harriak han utziko dituzte. Abesti batzuk kantatu eta Okendora itzuliko dira, azken abestia bertan abestu eta jarduerari amaiera emateko.
Karmengo jaiak
Sanpedroetako emanaldi horiez gain, Xumelako kideek jakinarazi dute Oria auzoko Karmengo jaietan parte hartuko dutela uztailaren 16an, igandearekin. Kantu eta dantza jira bat egingo dute bertan, eguerdian.