Aurreikusitakoa baino apur bat beranduago hasi da oholtza gaineko festa. Talentu bila ekimenean parte hartu dute hainbat lagun taldek. Trebezia handia erakutsi dute dantzan eta kantuan.
Hori amaitu ostean, eta gorputzak astintzen jarraitzeko gogoari eutsiz, Gas-gas abesti ezaguna dantzatu dute, eta goxorraketak ere egin dituzte. Gozokiak poltsikoratuta joan dira haur eta heldu asko etxera.
Gaur ere izango da jarduera bat baino gehiago. 18:00etan Kukuka Antzerki eta Dantza Eskolako kideek antzerkia erakutsiko dute. Ordu erdi geroago, berriz, haurrentzako jolas eta eskulanak hasiko dira, eta, ohi bezala Gas-gas dantzatuz eta goxorraketekin agurtuko dute eguna. Akelarrearen lehen entsegua ere izango dela iragarri dute antolatzaileek.
