Kontzentrazio handiarekin egin zioten aurre Ostadarreko jubenilek aurrean zuten erronkari, Gipuzkoako txapelketa berrestea. Horregatik, Asier Acuriolak zuzentzen duen taldeak garaipena buruan zuela atera zen kantxara.
Joko ederra egin zuten lasarteoriatarrek eta nagusi izan ziren; puntuak kontrolpean izan zituzten eta Donostiako taldeari aukera gutxi eman zizkioten. Ondorioz, 3-0 (25-16, 25-12 eta 25,15) gailendu zen Ostadarreko taldea.
Urteko lana
Gipuzkoako txapelketako garaikurra jasoaz, denboraldi paregabeari amaiera ematen dio Acuriolaren taldeak; partida bakarra galdu dute jubenilek urte osoan zehar.
Acuriola pozarren agertu da jubenilek finalean izan zuten jardunarengatik eta batez ere, urtean zehar taldeak erakutsi duen garapenarengatik. "Bigarren urtez lurraldeko talderik onena gara. Iaz justu lortu genuen txapelketa; aurten taldea asko hazi da eta denboraldi hasieratik bere nagusitasuna erakutsi du," adierazi du talde urdin-beltzako prestatzaileak.
