Brunet parkea izan da auzoetako ikastaroen lekuko

Lasarte-Oriako Udalak antolatutako auzoz auzoko jarduerak Oriara iritsi dira larunbat goizean. Aurreko asteburuetan Sasoeta eta Zabaleta izan dira gune, oraingoan, berriz, Brunet parkean elkartu dira ipuin kontalaria eta henna tatuaje tailerra. Eguraldia ez da aproposena izan, eta agian horrexegatik hamar bat haur bertaratu dira. Batetik bestera ibili dira, hennarekin egindako marrazkia nahi zutenek, egin ondoren, adi-adi entzun dituzte kontakizunak. Bost ipuin kontatzeko asmoa bazuen ere, ordubeteko saioan laurako denbora eman dio kontalariari.