Herritarrei bozkatzera joateko eskatu die sozialistek

Txintxarri Aldizkaria 2023ko mai. 17a, 13:10

Azokara larrosak banatzera joan aurretik agerraldia egin du Lasarte-Oriako PSE-EEk, Jaizkibel plazan. Agustin Valdivia alkategaiarekin izan da Batzar Nagusietarako Donostialdeako hautagai Susana Garcia Chueca. Biek ala biek hilaren 28ko hauteskundeen garrantzia nabarmendu dute eta herritarrei etxean ez geratzeko eskatu: "EH Bilduri mesede egiten dio abstentzioak". 

Valdiviak behin eta berriro errepikatu du premiazkoa dela alderdi sozialistari bozka ematea: "EH Bilduk lau urtez gobernatu zuen Lasarte-Orian eta erabat geldi egon zen udaletxea tarte horretan, ezin dugu horretara itzuli". PSE-EEren kudeaketa goraipatu du eta hilaren 28ko hauteskundeetara begira "aukera onena" dela nabarmendu. 

Garcia Chuecak "buruarekin bozka emateko" eskatu die lasarteoriatarrei: "Pentsatzen duzuna bozkatu da gure leloa, baina, aldi berean, bozkatzen dutena ongi pentsatu behar dute herritarrek, ez delako berbera sozialisten edo besteen alde egitea". PSE-EEren programan jarri du fokua, eta azpimarratu enplegua, langileen eskubideak, etxebizitza, hezkuntza, osasuna eta pertsonen babesa direla oinarri nagusiak. "Horien guztien gaineko arazoak guk bakarrik konpon ditzakegu, kudeaketa eraginkor baten bidez".