"Kanpalekuetan une gogorrak jasaten dituzte: udan, adibidez, 55 gradutik gora izaten dituzte, jasanezina da hori", adierazi du Arrutik. "Bi hilabetez etortzen dira haurrak, ekain amaieratik abuztu bukaerara arte. Tarte hori aprobetxatzen dugu mediku azterketak egitera eraman eta elikadura aproposa emateko". Pandemiak proiektuari eragin dio; iaz berreskuratu zuten ume horiek etxeetan hartzeko aukera. "Koronabirusaren aurretik, sei bat pertsona etortzen ziren gurera", gogoratu du. "Herritarren bat animatzen bada eta gugana jotzen badu, Oporrak Bakean egitasmoa kudeatzen dutenengana bideratuko dugu".
Gogor lanean, 2009tik
Oporrak Bakean programaren lantaldea 2009an eratu zuten, Mendebaldeko Saharako Fronte Polisarioak Euskal Herrian duen ordezkaritzak hala eskatuta. Bertako kideek, Euskal Fondoak eta Euskal Autonomia Erkidegoko hiru lurraldeetako boluntarioek aurrera eramaten dute egitasmoa, herriz herriko udal eta taldeekin elkarlanean. Helburu nagusia, esan bezala, familia euskaldun edo udalekuetan 8 urteko haur sahararrak hartzea da, udarako hilabeteetan.
Antolatzaileek nabarmendu dute "oso onuragarria" dela ekimenean parte hartzea umeentzat, "osasun kontuengatik, ikasten duten guztiagatik eta bizitzen duten esperientziagatik". Bidenabar, harrera familientzat ere "komenigarria" dela adierazi dute. "Errealitate berri bat ezagutu eta elkartasuna nahiz enpatia jorratzen dituzte".