Agustin Valdivia alkateak eta Gizarte Zerbitzuak saileko buru Lourdes Acevedok adierazi dute "oso pozik" daudela erdietsitako akordioarekin. "Hiru urteko lan gogorra izan da. Bilera ugari egin ditugu Aldundiko Gizarte Gaietako diputatu Maite Peñarekin; fruitua eman dute", adierazi du Valdiviak. "Plaza gehiago eskaini ahalko dizkiegu herriko adinekoei, eta itxarote zerrendan egon beharreko denbora murriztuko, azpimarratu du Acevedok. "Funtsezkoa da pertsona horiek euren ingurunean bizitzen eta Lasarte-Oriako bizitzaren parte izaten jarraitzea". Bestalde, alkatearen hitzetan, "adi" egongo da udala, obrek "ahalik eta gutxien" eragin dezaten honezkero egoitzan dauden egoiliarren egunerokoan.
"Gaur egun, Atsobakarrek U forma du; obrekin, itxi egingo dute, eta O bilakatu", azaldu du alkateak. Horrez gain, aldeetan bi hegal zabalduko dituzte. Lehen esan bezala, tutoretzapeko sei apartamentuak goiko solairuan eraikiko dituzte: indibidualak edo bikoitzak izango dira, oinarrizko azpiegitura guztiekin eta terraza banarekin. Gehitu du udalaren eskumena izango direla pisu horiek, eta gurean egiten dituzten aurrenekoak izango direla. Europako Next Generation funtsarekin finantzatuko dituzte lanak bi erakundeek, oso-osorik.
Erakundeen arteko elkarlana
Atsobakar egoitzan aurrera eramango dituzten lanen nondik norakoak zehazteaz gain, Valdiviak eta Acevedok balioan jarri dute Gipuzkoako Foru Aldundiarekin egindako elkarlana. "Bataren zein bestearen helburuak eta interesak bat datozenean horrelako akordioak erdiesten ditugu eta onuradun handienak herritarrak izaten dira", nabarmendu du Gizarte Zerbitzuetako buruak. "Batzuetan, bilera eta lanketak egiten ditugu baina ez dira mamitzen; kasu honetan, ordea, bai", adierazi du alkateak. "Euren artean kolaboratzea da administrazio eta erakundeen zereginetako bat".
Agerraldia amaitu aurretik, bi udal ordezkariak azpimarratu dute Atsobakar egoitza zabaltzeak langile gehiago behar izatea dakarrela, eta horrek "lanpostu berriak" sortuko dituela.