Erritmo handiko neurketa izan zen. Hasieratik bi taldeek goian egin zuten presioa eta horrek ateetan arriskurik ez egotea ekarri zuen.
Jokoa aurrera joan ahala Eguzki kantxan kokatu eta gol aukerak sortzen joan zen. Aldeko korner baten erreboteaz baliatuz, Antiguokok gola egin zuen, ordea.
Zaplaztekoa jaso arren, Josu Lopezen jokalariak ez zuten amore eman eta berdinketa lortzeko borrokatu ziren. Atsedenaldirako bost minutu faltan, Erik Utielen jokaldi paregabeari esker indarrak parekatu ziren markagailuan.
Bigarren zatia gogotsu hasi zuen etxeko taldeak eta aurkariaren atera hurbildu zen behin baino gehiagotan. Gol bat ere baliogabetu zioten Eguzkiri.
Ahaleginek fruitu izan zuten. Aitor Santestebanek baloia lapurtu ostean, Lander Martinek 2 eta 1ekoa egin zuen. Minutu gutxira etxekoen aldeko penaltia ere izan zen eta Mikel Gonzalezek ez zuen huts egin.
Alabaina, donostiarrak ez ziren esku hutsik joan nahi eta penalti bikoitz bati esker aldea murriztu zuten. Ongi erantzun zuen Eguzkik eta Gonzalezek berriro aurkariaren atea zulatu zuen.
Azken minutuetan Antiguoko jokalari bat galdu zuen eta hori baliatuz, erabakigarria izango zen bost eta bikoa jarri zuen markagailuan etxeko taldeak.
Hurrengo jardunaldia ere garrantzitsua izango da; Ausa Zaldibi izango du aurrez aurre Eguzkik. Zaldibiko taldea jaitsiera postuetatik kanpo dago eta hiru puntuko aldea dago bakarrik.