Asfaltatze lanak eta espaloi konponketak egingo dituzte herriko zazpi gunetan

Txintxarri Aldizkaria 2023ko ots. 15a, 13:00
Deskargatu Info Ahotsak :
Español English Français Català Galego

Zerbitzuak saileko buru David Mateos eta Agustin Valdivia alkatea, asfaltatze kanpainako eremuetako batean, Zumaburu kalean.

Lasarte-Oriako Udalak iragarri du herriko zazpi eremutan asfaltatze lanak eta espaloiak konpontzeko obrak aurrera eramango dituela datozen hilabeteetan. Asfaltia enpresari adjudikatu dizkio lanak, 127.419 euroren truke. Kontratua "sinatzear" dutela aurreratu du udaleko Zerbitzuak saileko buru David Mateosek; behin hori eginda, enpresak bi hilabete izango ditu lanak gauzatzeko.

Hauek izango dira asfaltatze eta konponketa kanpaina honetako zazpi eremuak:

    • Bistaeder- San Frantzisko kalea, Zatarain auzoan.
    • Errekaldeko 3. zenbakia.
    • Kale Nagusia, 28. zenbakia.
    • Kale Nagusia, 41. zenbakia.
    • Kale Nagusia, 51. zenbakia (alboetako batean).
    • Pablo Mutiozabal eta Pintore kaleetako elkargunea.
    • Zumaburu kalea, 8-12 zenbakiak.
Kale Nagusiko 28. zenbakiko zebra bide hau berritzeaz gain, zuzen jarriko dute, diagonalean baitago.

Mateosek azpimarratu du Bistaeder-San Frantzisko gunean egingo duten esku hartzea, izan ere, zebra bide bat egingo dute, San Frantziskoko 16. zenbakian bizi direnek aukera izan dezaten erdigune aldera etortzeko. "Auzotarren eskaera horri erantzutea funtsezkoa da".

Gizartea