Zabaletako bizilagunak izan dira makila astintzera atera diren lehenak. Baserritar jantzi dotoreak soinean, 11:00etan elkartu dira auzoko plazan, eta zabalgunearen erdian abestu dituzten lehen kantak. Ondoren, makilak eta kantutegia eskuetan, auzoan barrena ibili dira, baserrietara abiatu aurretik. Joseba Tapia eta Iratxe Zelaia trikitilarien musikak lagundu die bidean.
Arratsaldean, hitzordua bikotza izan da. Erketzeko lagunek Santxo tabernan abestu dituzte lehen doinuak, eta hortik, Okendora bidea hartu dute. Geltoki kaleko errepidean beste geldialdi bat egin ondoren, Zumaburura abiatu dira, trikitixa eta pandero doinuek lagunduta. Tabernaz taberna eta kalez kale egin dute beraien saioa.
Ordubete geroago, Sagardotegi kalean, Jalgi Kafe Antzokiaren atarietako batean batzen joan dira txistulariak eta Xumelako lagunak. 18:00etan abesteari ekin, eta handik, azkar joan dira Brigitarren komentura, zain baitzituzten mojak. Makil luzeak eskuetan, zapi gorriak lepoan, agertu dira haietako zortzi. Errepertorio osoa eskaini diete koruko kideek, unean asmatutako kopla eta guzti. Bi urteko etenaren ondoren, pozik elkar ikusi dute bi aldeek, eta aurrekoetan bezala, irrintziak egitera animatu dute mojetako bat. Besarkada, barre eta esker hitzekin agurtu dira, santa eskean jarraitzeko. Bi orduz ibili dira erdialdeko kale eta tabernetako giroa alaitzen, Okendon bukatu aurretik
Kantu eta makil kolpeka, nahikoa oles egin diote lurrari, esnatu, eta udaberria laster ekar dezan.