Hirugarren mailan parte hartuko du herriko taldeak eta helburu garbia dute mailaz igotzea. "Iaz hirugarren sailkatu ginen eta igoerako atarian geratu ginen. Aurten helburua igoera izango da", adierazi digute Taulako kideek.
Jose Ignacio Etxeberria, Juan Cruz Figueras, Alex Sanchez eta Juan Luis Varela izango dira jardunaldiz jardunaldi bigarren mailara igotzeko borrokatuko diren kideak.
Esperientzia eta formakuntza lortzeko asmoarekin 2022 urtean entrenamendu saioak gehitu eta bakarkako torneo ezberdinetan jardun dira Taulako kideak. "Ostiraletan 17:00etatik 20:00etarako gure lokalean egiten ditugun saioez gain, bestelako entrenamenduak ere egin ditugu", azaldu dute.
Denboraldi honetako lehen aurkaria Hondarribia Marlaxka D taldea izango da. Hitzordua hilaren 21ean, larunbatarekin, 16:00etan izango da Taula Xake Taldeak erabiltzen duen Blas de Lezo kaleko lokalean.
Hurrengo jardunaldietan, berriz, Bidasoa E, Zumaiako C eta D, Agustin de Leiza B, Txaturanga, Domusa Azpeitia B eta Billabona E izango ditu aurrez aurre. Pausoz pauso Taula Xake Klubeko kideak euren xedea lortzeko egingo dute lan.