Ostadar Boleibola taldeko infantil taldeek euren zaletuen aurrean jokatu zuten Gipuzkoako aurretiko faseko azken jardunaldia, Maialen Chourraut kiroldegian. Ostadar A zein B taldeek Hernaniren aurka lehiatu ziren hilaren 17an eta bi partidetan aurkaria izan zen garaile.
Eguneko lehen partida borrokatua izan zen eta azken setean erabaki zen (25-17, 15-25, 20-25, 25-11 eta 7-15). Bigarrenean, aldiz, 0-3 nagusitu zen Hernani 2.
Euskal Ligako taldeek ere ez zuten zorte hoberik izan eta biek 1-3 galdu zuten.
Mutilen taldeak lehen seta eskuratu arren, gainerako hiruretan ezin izan zuen Udapa Jatokideren jubenilen aurka.
2. mailako jokalariak ederki egin zioten aurre Navarvoleyri. Alabaina, lehen seta bakarrik irabazi ahal izan zuten.
Jubenilak, lehen faseko buru
Jubenil mailako taldeak, aldiz, ez zuen jardunaldirik izan. Hilaren 11n jokatu zuen aurretiko faseko azken neurketa eta 3-0 irabazi zion Hernaniri.
Talde urdin beltzak ez du norgehiagokarik galdu txapelketa horretan eta horri esker, sailkapeneko buru amaitu du bere multzoko lehia.