Eguberrietako jaiotzen lehiaketa antolatu du Danok Kide elkarteak

2019ko jaiotzen lehiaketako partaideen talde argazkia.

Danok Kide Elkarteak jarduera tradizional bat berreskuratu du aurten: Eguberrietako jaiotzen lehiaketa. Oinarrien berri eman du: 6 urte edo gehiago dituzten herritarrek parte har dezakete, abenduaren 16 eta 17ra arte. Sariak datorren hilaren 30ean banatuko dituzte, 12:00etan, eragile horrek Blas de Lezo kalean duen egoitzan.

Lehiaketaren oinarriak

  1. Jaiotzek 80x60 zentimetrokoak izan behar dute asko jota. Hondo sendoa duen egiturarik ez dute onartuko antolatzaileek, eta noizbait beste lehiaketaren batera aurkeztutako lanik ere ez. 
  2. Banaka nahiz taldeka parte har dezakete herritarrek. Norbanako edo partaide multzo bakoitzak jaiotza bakar bat aurkeztu ahalko du.
  3. Gutunazal itxi bat entregatu beharko dute jaiotzarekin batera. Kanpoko aldean adina idatzi behar du partaideak, eta barrukoan, izen-abizenak, telefono zenbakia eta helbidea.
  4. Aurkeztutako lanak kalitate nahikoa ez dutela ondorioztatuz gero, epaimahaiak saririk gabe utz ditzake kategoriak.

Sariak, kategoriaka

Partaideak lau kategoriatan banatuko dituzte: 6 eta 9 urte artekoak (A kategoria), 10 eta 13 urte artekoak (B), 14 eta 17 urte artekoak (C) eta 18 urtetik gorakoak (D). Danok Kideko lagunek zehaztu dutenez, aurkeztu ostean onartua izan den jaiotza bakoitzaren egileak 15 euro jasoko ditu. Multzo bakoitzeko garaileek sari hauek jasoko dituzte:

  • A kategoria: lehenengoak, 70 euro eta garaikur bat; bigarrenak, 50 euro eta trofeo bat.
  • B kategoria: lehenengoak, 80 euro eta garaikur bat; bigarrenak, 60 euro eta trofeo bat.
  • C kategoria: lehenengoak, 100 euro eta garaikur bat; bigarrenak, 70 euro eta trofeo bat.
  • D kategoria: lehenengoak, 130 euro eta garaikur bat; bigarrenak, 100 euro.

Danok Kide elkarteko lagunek lasarteoriatar guztiak animatu dituzte lehiaketan parte hartzera. Saritutako jaiotzak Muebles Azpeitia dendan jarriko dituzte, eta gainerakoak, San Pedro parrokian.