ESKUALDEA

Arkaitzerrekaren egoera ezagutu dute, bertatik bertara

Txintxarri Aldizkaria 2022ko aza. 16a, 12:12
Dozenaka pertsona izan ziren Arkaitzerrekan iragan larunbatean. Argazkia: Noaua aldizkaria.

Lasarte-Orian Aire Garbia plataformaren deiari erantzun, eta zenbait herritar Arkaitzerrekan izan ziren iragan larunbatean, Erraustegiaren Aurkako Mugimenduak antolatutako ibilaldian. Errekasto horren egoera bertatik bertara ezagutu zuten. Aire Garbiak deia egin die herritarrei GuraSOS eragileak hilaren 27an Donostian egingo duen manifestaziora joateko. 12:00etan jarri dute hitzordua, Bulebarrean.

"Gaur ere gorritsua, zikina, kutsatua zegoen, zikinkeriari eutsi ezin zion 'hesiak' inguratua. Kiratsa zerion". Horrela hasten da Usurbilgo Noaua aldizkariak iragan larunbateko Arkaitzerrekara bisitari buruzko kronika. Esteka honetan irakur dezakezue, oso-osorik. Eskualde mailako ekintza izaki, atxikimendua adierazi zion Lasarte-Orian Aire Garbia plataformak, eta deiari erantzuna, zenbait lasarteoriatar bertaratu ziren Zubietako erraustegiaren azpitik igarotzen den errekastora, nola dagoen ikustera.

Gipuzkoako Fiskaltzak ikerketa bat ireki zuen uztailaren 14an errekasto horretan gertatzen dena argitzeko, GuraSOS plataformak jakinarazi zuenez. Orduko horretan gezurtatu egin zuen Gipuzkoako Hondakinen Kontsortzioak (GHK) erraustegitik isuritakoek Arkaitzerreka kutsatu izana.

Erreka horretan gertatutakoa oraindik argitu ez denean, Noaua-k berak urriaren 28an aurreratu zuenez, GHK-k baimena eskatu dio Ura agentziari ponpaketa sistema bat eraikitzeko Arkaitzerrekan, erraustegitik jaisten diren urak saneamendu sistemarekin konektatzeko. GuraSOSek salatu du Monpaseko hustubidetik irtengo liratekeela ur horiek, Donostiako Zurriola hondartzaren ingurura, "dioxina eta beste osagai kutsakorren arazketarik gabe, Loiolako Hondakin Uren Araztegian (HUA) ezarritako sistema ez delako egokia hori egiteko". 

GuraSOSen mobilizazioa Donostian

Arkaitzerrekan gertatzen ari direnak deitoratzeko asmoz, GuraSOSek mobilizatzera deitu ditu herritarrak hilaren 27an, igandez, Donostian, 12:00etatik aurrera. Kursaaletik abiatu, eta Zurriolako hondartzan amaituko da. Leloa Orain Bai, gelditu! Diálogo Solución izango da, eta asmo nagusietako bat izango da enegarrenez eskatzea Zubietako erraustegia geratzeko. 

Hitzaldi bat Hernanin

Erraustegiaren Aurkako Mugimenduak sare sozialen bidez berri eman duenez, eskualde mailako beste jarduera bat prestatu du larunbat honetarako, hilak 19, Hernaniko Biteri aretoan, Hernani Zero Zabor eragilearekin elkarlanean. ToxicoWatch fundazioaren ikerketan oinarrituta egin den erraustegiaren kutsaduraren ikerlana aurkeztuko dute.