Radu Ratoi eta Antonio Serrano, XIX. Akordeoi Jaialdiko artista gonbidatuak

Zero Sette Akordeoi Orkestrak XIX. Akordeoi Jaialdia egingo du larunbat honetan, hilaren 19an. Kultur etxean izango da hitzordua, 19:00etan eta bi gonbidatu arituko dira oholtzan: Radu Ratoi eta Antonio Serrano. Sarrerek 6 euro balio dute

Aintzatespen eta garaikur ugari jaso dituzte bi artista gonbidatuek beren orain arteko musika ibilbidean. Radu Ratoik nazio eta nazioarteko 30 sari baino gehiago jaso ditu, horien artean, Coupe Mondiale, Castelfidardo edo Klingenthal. 2017. urtean Moldaviako Errepublikako kultur sailaren eskutik kulturgintzako ikasle onenaren saria ere eskuratu zuen, eta 2018an Bikaintasunaren diploma eta Moldaviako artistarik onenarena ere eman zion Moldaviako Errepublikako Lehendakariak. 2019an Arrasate Hiria, Nazioarteko Akordeoi Lehiaketako lehen garaikurra ere lortu zuen. Gaur egun Royal Danish Academy of Music-en ikasten du, Geir Draugsvoll irakaslearekin.

Antonio Serrano, berriz, jazz eta musika klasikoko harmonista bertutetsua da, baita piano, biolin  eta perkusio jotzailea ere bada. 1992ko Musikari Gazteen Eurovision Jaialdian Espainia ordezkatu zuen. Erraztasun tekniko harrigarria eta ezagutza teoriko sakonak ditu, eta Serranok, halaber, musika moldakortasun izugarria erakusten du. Hainbat estilotako musika jotzen du,  hala nola jazza, bluesa, flamenkoa, popa edota musika klasikoa. Haizezko instrumentu hau flamenkoan sartzea izan da Espainiako musikari egin dion ekarpenik handiena, berrikuntza hori sendotuz, Paco de Luciaren taldeko kide izan baita 2004 eta 2014 artean.

Oraingoan, Harmonious bere bakarkako proiektua ekarriko du Lasarte-Oriara. Musika klasikoa, jazza, bluesa, popa eta flamenkoaren generoak esfortzurik gabe gurutzatuz, Antoniok bere melodien moldaketa bakarren errepertorio eklektikoa joko du, pelikuletako kantuetatik hasi eta Bach eta Bacharach-en konpositoreen abesti herrikoietaraino, baita bere jatorrizko konposizioak ere.