Mende laurden, 25 argazkitan

Txintxarri Aldizkaria 2022ko urriaren 28a

25 urte edo aldi, ez dira ahuntzaren gauerdiko eztula. 1996 urtean Euskararen Maratoiaren barruan egin zen lehen Lasarte-Oria Bai! Kros Herrikoia. Lasarteoriatarren egutegi eta bihotzetan lekua egin, eta urtez urte partaide kopurua handitzen joan da: gure herrikoak ez ezik, beste askotakoak ere etortzen dira lasterketan parte hartzera. Eta ez hori bakarrik: korrikalariez gain, gurpildun aulkiko lehiakideak, patinatzaileak eta ipar martxako kideak ere gehitu ditu. Urte hauetan guztietan ibilbidea moldatu behar izan dute antolatzaileek behin baino gehiagotan.

25 edizio horiek ospatzeko Ostadar SKTko kideek herriari bizia emango dioten ekimen bereziak antolatu dituzte hilaren 30erako. Lasarte-Oriako txistulariek 09:00etatik 10:15era herria esnatuko dute. Eguerdian, herriko kaleak alaituko ditu Oaintxe in deu! txarangak. Arratsaldean, berriz, 18:00etatik 19:30era trikipoteoa egingo dute herriko kaleetatik.

Horrez gain, antolatzaileek Lasarte-Oriako taberna, jatetxe, okindegi eta bestelako komertzioek eskainitako oparien zozketetaren barruan bost sari berezi izango direla iragarri dute, Noaua Bidaiak-en eskutik.

Kirola