Elkarrekin Lasarte-Oria Podemoseko zerrendaburu izateko aurkeztu da Miguel Angel Tolosa

Txintxarri Aldizkaria 2022ko urr. 10a, 10:51

Miguel Angel Tolosak bere burua aurkeztu du datozen udal hauteskundeetan Elkarrekin Lasarte-Oria Podemos alderdiko alkategai izateko. Barne prozesua gaur hasiko da, Bat Egin markapean. Militanteek bermatu beharko dute hautagaitza hori.

Uruguaitarra jaiotzez, Lasarte-Oriako udal korporazioko hamazazpi zinegotzietako bat da Tolosa gaur-gaurkoz. 2015ean sartu zen politikan, eta urtebete geroago Euskadiko Herritarren Kontseilu Autonomikoko kide izan zen. Horrekin batera, Podemoseko Euskadiko finantza arduraduna izan zen, 2018ra arte, eta 2019ko autonomia eta udal kanpainetako hauteskunde administratzaile kargua bete zuen. Aurtengo maiatzean Tania Rodriguezen zinegotzi kargua hartu zuen.

Bere burua politikari profesionaltzat ez duen arren, "ilusionatuta" dago Tolosa, "Lasarte-Oriaren alde" lan egiteko. "Ikuspegi sozial batetik gure herriak behar dituen hobekuntzak bultzatuko ditut", adierazi du. Udalerria "aurrerakoi, berdinzale, feministago eta ekologistagoa" izatea helburu duela gehitu du.