Hemengo eta hango kultura lotu dute Aste Kulturalean

Semblante Andaluzek antolatutako jarduera sortan Lasarte-Oriak azken hamarkadetan bizi izan duen eraldaketari buruzko hitzaldia izan da goizeko lehena. Txema Valles kazetariak gidatuta, Jesus Mari Egizabalek eta Julian Sagardiak azalpen ugari eman dituzte azken honek egindako bideo batzuk ikusi ondoren. Lehengo eta oraingo argazkiak oinarri zituzten ikus-entzunezkoek argi erakusten dute eraikin, kale eta herriko beste txokoak zenbat aldatu diren. Jarraian, Semblante Andaluzeko Duende laukoteak sevillana erakustaldia egin du karparen txoko batean bazkaritarako paella prestatzen ari ziren bitartean. Txartelak erosi dituztenek geroxeago izan dute hura dastatzeko aukera. Arratsaldean, berriz, dantza izan da protagonista Amaia Gonzalez Caballerok runba flamenkoa irakatsi baitu, musika eta dantzaldi irekiaren aurretik.