Ez da izan argi eta ozen iragarri ez dugulako. Santa Anako parodian parte hartuko duten aktoreak Hipodromo etorbidetik Tajamar biribilgunerantz zihoazela, herritar bat taldearengana hurbildu eta galdetu die ea zertan ari ziren, ezkondu aurreko despedida bat ote zen. Emanaldia 20:30ean hastekoa bada ere, parodian kontatzeko modukoak direnak bizitzen hasi dira protagonistak. Galderari, noski, umorez eta barrez lehertzen erantzun diote antzezleek, eta galdera egin duena Okendo plazako aulkietako batean esertzera gonbidatu, ikuskizunaz goza dezan.
Hori bera egingo dute hainbat lasarteoriatarrek. Azken bi urtetako parodiak desberdinak izan dira, aurrez aurreko esketxak eta bideoz grabatuak uztartu dituzte, Manuel Lekuona Kultur Etxean. Aurten, ohiko egitura berreskuratu du antolatzaile taldeak, eta Okendora ekarri, ohiko tokira. Hainbat hamarkadaz egin bezala, ikasturte honetan Lasarte-Orian gertatutakoak umorez landuko dituzte, eta Josune Jone Prezioandia Oktanogutxik eta Ibertrolas Prezioandia Peromuygalan epaitu. Aurreko alproja guztiak sutara kondenatu ditu epaimahaiak, eta beraz, urduri samar daude biak, aurrekariak ez baitira baikorrak izateko modukoak. Ea zer gertatzen den. Erantzuna, minutu gutxi barru.