Gutxieneko markak Miren Sarobe infantilak eskuratu zituen. Estilo libreko 50 m. eta 100 m. probetan lehiatu zen. Denbora "politak" eginez, 29,00 eta 01.02,58, hurrenez hurren, marka pertsonalak hobetu eta Infantil mailako Euskal Herriko Udako Txapelketarako gutxienekoak egitea lortu zuen. Ez hori bakarrik, Absolutu mailako Euskal Herriko Udako Txapelketan parte hartzeko aukera ere lortu zuen.
Garazi Etxeberriak, berriz, bi proba egin zituen: 50 metro bular eta lau estiloetako 200 metroko proba. Buruntzaldea IKTko arduradunek jakitera eman dutenez, Garazi belaunean lesio batekin dabil eta "min horrek ez zion bere onenean lehiatzeko aukerarik eman". Hala ere, bular proban bere marka pertsonaletik gertu ibili zen (36,67)eta lau estiloetako proban berriz, 02.41,29 denbora egin zuen.
Azkenik, Nora Imazek 50 m. eta 100 m. libre zein bular probak lehiatu zituen. "Entrenamenduetan prestatzen dituen probak ez direla kontuan izanik, marka txukunak egin zituen," adierazi dute prestatzaileek. Lehen proban bere markatik gertu geratu zen, 29,03; 100 m. bular proban 01.21,65 denborarekin marka pertsonala lortu zuen eta 100 m. librean berriz, "aspaldian lortu ez zuen denborara gerturatu zen", 01.01,68 marka eginda.
Igerilari horien hurrengo hitzordua Gipuzkoako V. Open Saria da, Donostiako Paco Yoldi kiroldegian. Ekainaren 4-5eko asteburuan, igerileku luzean maila oneko igerilarien artean lehiatuko dira.