Dantza "herrien benetako adierazpena" dela iritzita, munduko toki ugaritako hamar dantza talde elkartuko ditu Abarkak larunbat honetan, Oiartzungo Done Eztebe plazan. 11:00etatik 13:00era topaketa egingo dute, eta ondoren, luntxa, "partaideek elkar ezagutzeko aukera izan dezaten", antolatzaileek nabarmendu dutenez. Munduko Dantzak egitasmoaren barruko jarduera da, bi ordukoa: "Beste toki batzuetako koreografiak eta musika erritmoak aurkeztuko ditugu udaletxeko plaza nagusian; gertutik, beste leku batzuetara bidaiaraziko ditugu ikus-entzuleak".
Abarkako lagunek zehaztu dutenez, ekimenak hiru xede nagusi ditu: Oiartzungo komunitateari zein inguruko herrietakoei euren kaleak partekatzen dituzten kulturetako kideak hurbiltzea; herritarrak sentsibilizatzea komunitatean bizitzeko beharraz, gainerako errealitateak kontuan izanda; eta ikaskuntza sustatzea, aurkikuntzaren eta entretenimenduaren bidez.
Abarka erakundea 2015ean sortu zuten, eta orduz geroztik "hazten" ari da, "etengabe". Xedea da "elkartearen onuradun diren pertsonen bizitza atseginagoa egiteko irtenbideak ematea".
