Eskolarteko Gipuzkoako txapelketa amaitu da. Maiatzaren 1ean, hirugarren jardunaldia jokatu zen Arrasateko Mojategi kirol gunean. Ostadar SKTko atletismo saileko gaztetxoak bertan izan ziren eta bi domina berri gehitu zituzten denboraldiko poltsara.
Zehazki Eider Redondo alebina izan zen bi alditan podiumeko gorenera igo zen atleta.Gaztetxoak txapelketa ederrari amaiera eman dio. Aurreko jardunaldietan altuera-jauzian eta luzera-jauzian garaile izan zen eta bigarren, berriz, 60 metro hesi proban. Oraingoan, 60 m. lasterketan (8,36) eta jauzi hirukoitzean (8,75 m.) garaile izan da.
Era berean, Oihane Belartietaren lana azpimarratu nahi dute taldeko arduradunek. Infantil mailako luzera jauziko proban, 4,63 metroko jauziarekin laugarren postua lortu zuen.
Kluben Liga
Egun bat lehenago, apirilaren 30ean, Espainiako Lehen mailako zein Ohorezko mailako taldeek Ligako lehen jardunaldia jokatu zuten; Sorian zein Donostian herriko ordezkariak izan ziren.
Real Sociedad taldeak eta Yeray Veroniz herritarrak Joma Ligako Ohorezko Mailako denboraldiari ekin zioten Sorian.
Atletismo Numantino, S.G. Pontevedra eta A.D. Marathon izan ziren aurkariak eta Donostiako taldeak bigarren postua eskuratu zuen 192 punturekin.
Veronizek 100 m. lasterketan eta 4x100 m. erreleboan parte hartu zuen. Proba azkarrean laugarren postuan sailkatu zen. Errelebo proban, ordea, taldea kaleratua izan zen.
Ostadar Atletismo saileko kide Naroa Furundarenak eta Enara Gonzalezek, berriz, Ohorezko Mailako Iberdrola Ligako lehen jardunaldian izan ziren Super Amara Bidasoa Atletiko Taldearekin (BAT) Donostiako Kote Olaizola estadioan.
Bi gazteek bina proba lehiatu zituzten eta Furundarenak lortu zuen BATen sailkapenik onena bakarkako lehiaketetan.
Herritarra garaile izan zen jauzi hirukoitzeko txapelketan eta aire libreko bere marka pertsonala ondu zuen 12,73 metroko jauzia eginez. Gainera, hirugarren postua lortu zuen 4x100 m. errelebo taldearekin. Azken egin zuen Furundarenak.
Gonzalezek, aldiz, denboraldiko marka egin zuen luzera-jauzian (5,51 m.); jauzi hirukoitzean, ordea, 11, 15 metroko jauzia egin zuen.
BAT taldeak 136 punturekin amaitu zuen jardunaldia Ria Ferrol C. Arenal taldearekin berdinduta. aurretik Atletico San Sebastian eta Grupompleo Pamplona sailkatu ziren.
Maiatzaren 14an jokatuko dute Ligako bigarren jardunaldia.