Aukeratu berri den lehendakaria kargu hartze ekitaldirako diskurtsoa prestatzen ari da. Ispilu aurrean jarri da esan beharrekoa errepasatzen eta sudurrean azkura nabaritu du. Hazka eginda ere, bueltan da etengabe. Eutsi egiten badio, aurpegi arraroak jartzen ditu. Jende aurrean horrela agertu ezin dela jabetuta, medikuen laguntza bilatu du. Otorrinolaringoloak esan dio azkuraren arrazoia ez dela fisiologikoa eta psikiatra batekin hitz egiteko. Horren aurretik, ordea, irtenbide naturalago bat probatuko du lehendakari gaiak, emazteak hala eskatuta. "15 urtetan ez diot kontra egin, ez neukan gaur hasteko asmoa" . Horien guztien berri eman dio antzezlanaren hasieran mahaiaren beste aldean, aurrez aurre duen psikiatrari.
Azkuraren jatorria topatu nahian, psikiatrak hainbat galdera egingo dizkio lehendakari gaiari. Horietako batzuen zergatia ez du ulertuko eta harriduraz erantzungo dizkio. Erantzun bakoitzarekin aretoa ia bete duten ikus-entzuleen barreak eragin ditu Galartzak.