COVID-19

Apirilaren 11tik 18ra 35 kutsatze atzeman dituzte Lasarte-Orian

Osakidetzak eta Eusko Jaurlaritzako Osasun Sailak hilaren 11tik 18ra arteko datu epidemiologikoak argitaratu dituzte. Tarte horretan 35 kutsatze atzeman dituzte Lasarte-Orian, eta azken hamalau egunetan, 68. Intzidentzia tasa metatua igo egin da apur bat: 352,44 da, astebete lehenago baino ia hogei puntu handiagoa.

Osasun agintariak datuak herriz herri xehatuta ematen hasi zirenetik, gure herrian 6.001 kutsatze atzeman dituzte. Birusak infektatu dituen herritar ia guztiak sendatu badira edo bidean badaude ere, zoritxarrez, 24k ezin izan dute osatu eta hil egin dira. Pandemia hasi zenetik, aurtengo urtarrilean atzeman dituzte kasu gehien: 2.120.

Buruntzaldeko sei udalerrietan 101 kasu diagnostikatu dituzte hilaren 11tik 18ra: 35 Lasarte-Orian, hogei Andoainen, hamasei Hernanin, hamabina Astigarragan nahiz Usurbilen, eta sei Urnietan.