Herritarren eskaerari erantzunez, Lasarte-Oriako Udalak komun publikoen sarea eraiki du. Askatasunaren parkean, Atsobakarreko parkean, Zabaleta Berriko Basotxo plazan, Loidi kalean eta Basaundi auzoan daude bost martxan. Orain Tximistarreta parkean eta Oztaran auzoko Plazaola bideko sarreran ezarriko dira bi berri. Valdiviak azaldu duenez, horiekin aurreikusia zuten zazpiko sarea osatu du udalak: "Komun publikoak ezartzea erabaki genuenean, herrian zehar jende asko igaro den leku estrategikoetan kokatzeko erabakia hartu zen. Bi zerbitzu berri hauek egun dagoen sareari batzen dira eta zazpi komun publikorekin plana amaitutzat ematen dugu".
Lasarte-Oriako Udalak Aseos Publicos Ibericos enpresari esleitu dizkio lanak eta 67.000 euro gehi BEZeko aurrekontua du kontratuak. Hiru hilabeteko epean eraikiko dira bi komunak.
Hirigintza batzordeburu Mateosek azadu duenez, gaur egun martxan dauden komunen antzeko etxolak izango dira. Erabilera mistoa duen komun itxia egongo da, "irisgarritasun arazoak dituzten pertsonei egokitua" eta kanpoaldean, pixalekua egongo da. Horrez gain, Oztaran auzoko zerbitzuak bizikletak garbitzeko gunea izango duela ere nabarmendu du: "Askatasunaren parkean edo Zabaleta Berri auzoko komunen antzera, bertan Buruntza aldetik edo inguruetatik bizikletan ibili direnei euren ibilgailua garbitzeko aukera eman nahi izan diegu. Horretarako ur mahuka bat eta bizikleta garbitzeko lekua izango dute".