Sorgin Jaiak eragileko kideek irmoki salatu dute Lasarte-Oriako Udalak Indioak eta bakeroak gaia aukeratu izana, eta iradokizun alternatibo bat egin dute: Lanbideak. "Koronabirusaren garaian, prekarietate egoera larri batean egonda ere, alor askotako profesionalek sistema sostengatzeko ezinbestekoak direla erakutsi dute, esate baterako, osasun langileek, garbitzaileek, adinetako egoitzetako beharginek eta abar luze batek". Eragileak profesional horien lana aitortu nahi du, eta horregatik deitu ditu herritarrak buruari eragitera eta ogibideez mozorrotzera. "Kultur, jatorri, arraza, identitate...anitzeko herri bat osatu nahi dugula aldarrikatuko dugu!".
Otsailaren 26an ospatuko ditu Lasarte-Oriak inauteriak, eta baita Sorgin Jaiak-ek ere. Gogotsu daude: "Has zaitezte zuen mozorroak prestatzen, herria sorginkeriaz betetzera gatoz!".
