Aterpea merkatarien elkarteak Ferraren Bila egitasmoko sariak banatu ditu, Lasarte-Oriako Udalarekin elkarlanean. Makina bat kanpaina egin ditu aurten Aterpeak, tartean, hori: hiru astetan zehar, urrezko zenbait ferra jarri dituzte bazkide diren dendetako erakusleihoetan. Bezeroek horiek topatu, argazkia atera eta Instagram edo Facebook sare sozialetara igo behar zituzten. Parte hartzaile guztien artean zozketa egin, eta hauek irabazi dituzte 500 euroko erosketa txartelak: Laura Hueso, Jone Gonzalez, Esther Sanchez eta Coro Ortega. Saridun bakoitzak hamar euroko 50na bonu jaso ditu. Eguberrietako erosketak egiteko laguntza ederra izan dela adierazi dute lauek.
Bestalde, erakusleiho dotoreenaren lehiaketa egiten ari da Aterpea; hilaren 18an bukatuko da. Bi sari banatuko dituzte: profesionala horietako bat, Rural Kutxak babestua eta epaimahai batek erabakiko duena; eta popularra bestea, udalak babestua eta lasarteoriatarrek erabakiko dutena.