Osasun agintariak datuak herriz herri xehatuta ematen hasi zirenetik, koronabirusak kutsatutako 2.408 lasarteoriatar atzeman dituzte, ehun biztanletik hamabi. Gehien-gehienak sendatu badira ere, zoritxarrez, 24k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.
Eskualdeko sei udalerrietan 282 kutsatze diagnostikatu dituzte ostiraletik astelehenera: 105, Hernanin; 61, Lasarte-orian, 49, Andoainen; 24, Astigarragan nahiz Usurbilen; eta 19, Urnietan.
Euskal Autonomia Erkidegoko hiru lurraldeetako batez besteko intzidentzia tasa 724,78 da: foku nagusia Gipuzkoan dago, adierazle hori 1177,17 baita. Osakidetzako ospitaleetan 266 pertsona daude oheratuta, eta horietatik 70ek sintoma larriak dituztenez, Zainketa Intentsiboetako Unitateetan daude.