Antxordokik gogorarazi du foru aldundiak 252.829,72 euro esleitu zizkiola udal gobernuari 2017. urtean, Gipuzkoako Kirol Ekipamenduen 2017-2020 Plan Estrategikoaren barruan. Dirulaguntza hori jasotzeko "baldintza bakarra", bozeramaile jeltzalearen aburuz, Atsobakar kirol eremuko lanak 2020a baino lehenago hastea zen. "Egia da Usurbilgo Udalak eragozpenak jarri dituela 2017. urtetik: administrazio izapideak eta txostenak eskatu ditu, legezko epeen mugetan askotan, lanak atzeratzeko helburuarekin. Lursaila Lasarte-Oriako Udalarena da, baina Usurbilgo lurretan dago".
"Finantzazioa ezin dugu galdu"
"Bi udalen arteko desadostasun tekniko baten artean ebazteko eskatu zitzaion foru aldundiari, Usurbilek eskatzen zituen txostenak beharrezkoak ziren ala ez erabakitzeko", adierazi du Antxordokik. "Oztopo horiei guztiei gehitzen badiegu COVID-19ak eragin duen geldialdia, hauxe da egoera: 2021ean gaudela eta Atsobakarreko lanak ez direla hasi".
Horren eraginez, udal gobernuak ez du foru aldundiaren dirulaguntza hori ingresatu, bozeramaile jeltzaleak deitoratu duenez. "Finantzazio hori ezin dugu galdu; ezinbestekoa eta beharrezkoa da alkateak diputazioarekin negoziatzea".