Agustin Valdivia alkateak, Partehartze batzordeburu Nagore Duranek eta Ospakizunetako batzordeburu Txus Alonsok aurkeztu dute egitasmoa. "Une horretako osasun egoera nolakoa den ikusi beharko dugu, baina 2022ko Inauteriak normaltasunez ospatzea gustatuko litzaiguke", adierazi du azken horrek. Iragan asteko astelehenean konpartsekin elkartu zen udala, eta Alonsoren aburuz, eragileak "oso animatuta" daude ekitaldia antolatzeko.
Txartelak, etxez etxe
Duranek azaldu du udala hasi dela proposamenak idazteko txartelak banatzen herritarren etxeetan. Eskuorria bete, eta udaletxeko bulegoetako postontzietara eraman beharko dute herritarrek, azaroaren 5a baino lehen. Eskuorri horiek hiru egun geroago bilduko ditu udalak, eta datorren urteko Inauterietako gaia erabakitzeko "oinarrizkoak" izango dira, konpartsetako kideen iritziekin batera.