Osasun agintariak datuak herriz herri xehatuta ematen hasi zirenetik, koronabirusak kutsatutako 2.152 lasarteoriatar atzeman dituzte, ehun biztanletik 11 pasatxo (%11,3). Gehien-gehienak sendatu badira ere, zoritxarrez, 24k ezin izan dute osatu eta hil egin dira. Iazko martxotik orain artekoan, azaroa izan da kutsatu gehien zenbatu dituzten hilabetea, zehazki, 275.
Beterri-Buruntza eskualdean zazpi kutsatze diagnostikatu dituzte: hiruna, Andoainen eta Lasarte-Orian; eta bat, Astigarragan. Gainerako, hiru udalerrien egoera bere horretan mantentzen da. Hala, Hernani eta Astigarraga izan ezik, gainerako lau udalerriak eremu horian daude.
EAEko hiru lurraldeetan 105 positibo detektatu dituzte; horietako 43, Gipuzkoan. Ostegunean 5.428 PCR eta antigenoen proba egin dituzte, eta haietako %1,9 izan dira positiboak. Osakidetzako ospitaleetan 95 pertsona daude ingresatuta koronabirusagatik; horietatik 37 larri daude, Zainketa Intentsiboetako Unitateetan. Atzo koronabirusak eragindako 27 lagun ospitaleratu ziztuzten.