Dagoeneko euskara ikasteko izena eman duten ikasleen taldeak osatzen ari dira udal euskaltegiko arduradunak. "Irailean egiten diren taldeek ekainera arte lan egingo dute". Behin ikasturtea hasita, tokirik libre egonez gero, dagoeneko martxan dauden taldeetan sartzea izango da aukera bakarra. Ia maila guztiak daude beteta honezkero, hasierako maila eta B2 maila izan ezik. Ikasleek ordutegi hauetakoren bat aukeratu dezakete: 09:00etatik 11:30era, 15:00etatik 17:30era eta 18:30etik 21:00etara. "Badakigu zer nolako ahalegina egiten duten ikasleek eguneroko zereginak eta euskara ikastea uztartzeko; hori dela eta, aukera izango dute ordu tarte horietan txandaka joateko klaseetara, horrek kontziliazioa errazten badie".
Udalaren dirulaguntzak
Lasarte-Oriako Euskara batzordeburu Jon Antxordokik gogorarazi du dirulaguntza "oso garrantzitsuak" eskaintzen dituela Lasarte-Oriako Udalak euskara ikasteagatik: klase gehienetara joanez gero (%85, gutxienez), matrikularen %85 ordainduko du. Bestela esanda: astean hamar orduz euskara ikasiz gero, bi euro ordainduko ditu ikasle bakoitzak.
Lasarte-Oriako Udal Euskaltegia herriko erdigunean dago, Maialen Chourraut kiroldegiaren eta osasun zentroaren ondoan. "Autobus eta tren geltokiak oso gertu daude, eta autobiara sartzeko bideak ere bai; animatu eta matrikulatu euskaltegian".