Eskola Kirola egitasmoak haurren eta gaztetxoen artean kirola sustatzea du helburu, eta horretarako, hiru programa eskaintzen ditu mailaren arabera.
LH1-LH2 mailakoek jolasen bidez kiroletara hurbilketa egiten dute, Jolas Hezi programan.Multi Kirolean zenbait kirol lantzen dituzte LH3-LH4 mailako gaztetxoek. Eta zaharrenek, LH5-LH6 maila, taldeko kirolez gozatzen dute: futbola, saskibaloia eta beste jarduera fisiko zein kirolak.
Egitasmoko antolatzaileek azaldu dutenez, 24 talde osatu dira dagoeneko, baina ez daude itxiak. Ekainean izena eman ez zuten haur eta gaztetxoek irailaren 25era arte dute egitasmoan inskribatzeko aukera. Horretarako, dagokion ikastetxeko guraso elkartearekin jarri behar dira harremanetan.
Topaketak
Horrez gain, aurten larunbateko topaketak berreskuratuko direla jakitera eman dute Eskola Kiroleko arduradunek.
Eusko Jaurlaritzak baimendu ostean, Gipuzkoako Foru Aldundiko, inguruko herrietako eta Lasarte-Oriako kirol arduradunekin bildu dira eta egitasmoko arduradunak lanean ari dira egutegi bat finkatu eta jarraitu beharreko osasun protokoloa zehazteko.
Saio berezi horiek azaroan hastea aurreikusten dute egitasmoko arduradunek eta ordurako xehetasun gehiago eskainiko dizkiete parte-hartzaileei.