Irten eta ikuslegoa zutik jarri dute The Chancletteko kideek. Sharonnek abestutako Icona Pop taldearen I love it abestiaren bertsioa, dantzatu eta txaloekin lagundu dute. Ondo pasatzeko gogoz joan badira kultur etxera, bete-betean asmatu dute; dantza, musika, akrobaziak eta umorea osagai dituen ikuskizunak horretarako aukera zabala eman baitu.
Azken hilabeteetan korodun elementu entzunena koronabirusa bada ere, errege-erreginak izan dituzte jomugan. Kargu politikodunak izan dira kritika zorrotzenak jaso dituztenak, baina musika alorreko erreginek izan dute protagonismo gehien: Tina Turner, Jocelyn Brown, Aretha Frankin edo mozkortutako Amy Winehouse, besteak beste.
Hamaika pertsonaia gorpuztu ditu laukoteak. Gehienek film, iragarki, telebista saio edota albistegietatik hartutako esaldi edo zatiekin osatutako off ahotsak bikoiztuta hitz egiten zuten; printzesa izan nahi duen neskatoak, kasu. Gainerako, berriz, zuzenean egin dute.
