Urdanpilleta aurten CD Hernani taldearekin ari da lehian. Trinketeko txapelketako bikotekako lehiari ekin zion apirilean Unax Manterolarekin batera eta lehen fasea sailkapeneko lehen postuan gaindituta finala jokatu zuen.
Finalean Hernaniko Julen Deskarga eta Manex Martin bikotearen aurkako neurtu zituzten indarrak.
Partida parekatua espero zen arren, Manterola-Urdanpilleta bikoteak partida bikaina egin zuen eta arerioen akatsak ongi baliatu zituen. Ondorioz, 40-19 gailendu zen finalean eta Urdanpilletak txapela jantzi zuen.
Udaberri txapelketa
Txapelketa honetaz gain, Urdanpilletak Haritza Diaz de Gereñu herritarra lagun I. mailako kadeteetako Udaberri txapelketa jokatu du Hernani 1 bikotea osatuz. Maiatzaren 25ean lehiatu zuten lehen faseko azken partida. Lau partidetatik lau galdu ostean, ezin izan dute txapelketan aurrera egin.
Kadeteen II. mailan berriz, ekainaren 5ean jokatu zuten azken jardunaldia.
Intzako Beñat Olazabal eta Pedro Eloseguik Bergarako bikotea izan zuten aurrez aurre etxean. Ederki borrokatu eta 22-8 garaitu zuten.
Partida honetan eskuratutako puntuekin, guztira 6 lortu dituzte eta euren multzoko hirugarren izan dira, bigarrenetik puntu batera. Azken faserako multzo ezberdinetako bi lehenak sailkatzen direnez txapelketako parte-hartzea amaitu du bikoteak.
Intzako I. senior bikotea ere txapelketa horretan lehian zegoen. Tamalez, Mikel Elolak pairatutako bizkarreko minek bi partidatan huts egitea ekarri zuen eta ondorioz, txapelketatik kanporatua izan zen.
Nahiz eta Intza elkarteko kideek lehiaketarik ez izan hurrengo asteetan, ekainaren 23an amaituko dituzte entrenamenduak eta irailera arte merezitako atsedena izango dute.