Udal Musika Eskolan aurrematrikulatzeko azken egunak

Udal Musika Eskolako kideen 2019ko Eguberrietako kontzertua.

Udal Musika Eskolan plaza eskatu nahi duten herritarrek maiatzaren 21era arteko epea dute, ostiralez, egun hori barne. Lasarte-Oriako Udalak jakinarazi duenez, kuota osoaren %10 ordaindu beharko dute aurrematrikula egiten duten herritarrek, une horretan bertan.

Matrikula egiteko epea beranduago hasiko da: ekainaren 7tik 18ra bitartekoa izango da, baina, tramite hori egin ahal izateko, "nahitaezkoa" izango da aldez aurretik aurrematrikula eginda izatea. Plazen esleipena e-posta bidez jakinaraziko duela adierazi du Udalak.

Hobariak 

GLL Gizarte-Larrialdietarako Laguntzak jasotzen dituzten pertsonek salbuespenak eta hobariak izango dituzte, eta langabetuek ere bai. Horrez gain, Udalak zein Eusko Jaurlaritzak ematen duen gazte txartelaren titularrek deskontua izango dute, %10; familia ugariek, aldiz, %30. Udal Musika Eskolako kuotetan hobariak eskatu nahi dituztenek honako baldintza hau bete beharko dute, ezinbestean: bizikidetza-unitate bereko bi kide edo gehiagok izena ematea  eskola horretan.

Udal Musika Eskolak jardun ahal izateko tasak bankuko domiziliazioaren bitartez pagatu beharko dira, bi modutara: ordainketa bakarra eginez, irailaren 25etik 30era; edo, bestela, zatikatua.

Ikastaro bakoitzeko tasak

  • Musika-txokoa: 285’35 euro erroldatuek eta 343’30 euro erroldatu gabeek
  • Hizkuntza musikala: 285’35 euro erroldatuek eta 343’30 erroldatu gabeek. 
  • Musika-instrumentua: 285’35 euro erroldatuek eta 343’30 erroldatu gabeek. 
  • Txistua edo akordeoia: 223’45 euro erroldatuek.
  • Hizkuntza musikala + instrumentua: 528’65 euro erroldatuek eta 641’60 erroldatu gabeek.
  • Hizkuntza musikala + txistua edo akordeoia: 414’30 euro erroldatuek. 
  • Korua: 47’80 euro erroldatuek eta 58’00 erroldatu gabeek.
  • Ganbera: 143’50 euro erroldatuek eta 172’30 euro erroldatu gabeek.
  • Instrumentu-taldea: 94’15 euro erroldatuek eta 114’45 erroldatu gabeek. 

Irailaren 1etik 15era, Hizkuntza Musikalean eta instrumentuetan libre gelditu diren plazetan matrikulatzeko aukera izango da, eskaerak iritsitako ordenaren arabera.