Tubacexeko langileei elkartasuna adierazi diete Michelingo ELA eta LAB sindikatuek

Laudio eta Amurrioko Tubacex lantegiek hiru hilabete daramatzate greban, enpresa burutzen ari diren kaleratzeen aurka protesta egiteko. Lanuzteak egiten ari diren beharginei elkartasuna adierazte aldera, hainbat enpresatan elkartasun-argazkiak egin dituzte gaur: tartean, Michelinen, ELA eta LAB sindikatuek deituta.

Tubacexen kaleratzerik ez! leloa irakur zitekeen langileek erakutsi dituzten karteletan; "enpleguaren alde borrokatzeko prest" daudela ere adierazi dute.

94 kaleratze

Laudio eta Amurrioko lantegietan beharrean aritzen diren 94 pertsona kaleratu ditu honezkero Tubacexek; beste 22k pizgarriekin utzi dute enpresa. Kaleratze horiek honezkero burutu diren arren, langileek protestan eta greban jarraitzen dute; otsailean hasi ziren.