Neguko denboraldia amaitu eta Aste Santuko etenaldiaren ostean, Buruntzaldea IKTko igerilariak berriro ere uretan lehiatu dira. Igeriketa taldeko infantil, junior eta absolutu mailako kirolariek kontrol lehiaketa izan zuten, maiatzaren 8an, Tolosan.
Proba honek udako denboraldiari hasiera eman zion eta berrikuntza bat izan zuen, 2007 urteko nesken parte-hartzea. Borja Apeztegia Buruntzaldea IKTko arduradunak azaldu duenez, "2007 urteko Miren Sarobek eta Nahia Goenagak etxeko entrenamendu batean Euskal Herriko gutxienekoak egin eta Gipuzkoako Foru Aldundiak federatu lizentzia izapidetzeko baimena eman die". Horri esker, biak Tolosako jardunaldian lehiatu ziren. Apeztegiak nabarmendu duenez, taldeko igerilari gehiagok baimena eskuratzea espero dute, "denboraldi honetan lehiatzea lortu dezaten".
Kontrol proba honetan hamasei marka ondu zituzten igerilariek:
- Aintzane Sarobe: 200 m. bizkar proba, 2:27,47.
- Nora Imaz: 100 m. lau estiloak proba, 1:12,66.
- Saioa Elola: 400 m. libre proba, 5:03,87 eta 200 m. libre proba, 2:27,08.
- Iker Gorostegui: 50 m. tximeleta proba, 33,54.
- Iker Gandia: 200 m. libre proba, 2:21,28 eta 100 m. lau estilo proba, 1:14,56.
- Jon Pelayo: 200 m. bular proba, 3:05,01.
- Miren Sarobe: 50 m. eta 100 m. libre probak, 33,11 eta 1:08,47, hurrenez hurren; 50 m. tximeleta proba, 39,87 eta 200 m. lau estilo proba, 2:54,81.
- Nahia Goneaga: 50 m. eta 100 m. tximeleta probak, 39,39 eta 1:26,55, hurrenez hurren; 200 m. lau estilo proba, 2:54,49 eta 400 m. lau estilo proba, 6:10,19.
Marka hobekuntza ugaria izan ez bazen ere, Buruntzaldea IKTko igerilariek lan ona egin zutela azpimarratu du Apeztegiak. "Gehienak euren marka onenetatik oso gertu aritu zirela esan behar dugu, atsedenaldi baten ondoren ziklo berri bat hasi izanarekin bat datorrena".
Europako txapelketa
Nahia Zudairek ere denboraldi berriko lehen txapelketa izango du. Txapelketa garrantzitsua izango da gainera, 2020 urteko Igeriketa Egokituko WPS Europako Txapelketa. Irakurleak txapelketako edizioan akatsa egon daitekeela uste arren, pandemia zela eta, 2020 urteko edizioa atzeratu eta aurtengo maiatzean egitea erabaki zuen Europako federazioak. Beraz, igandetik maiatzaren 22ra, Buruntzaldea IKTko igerilariak Madeirako Funchal hirian, Portugalen antolatu den lehian parte hartuko du.
Espainiako Selekzioaren izenean Zudaire lau probatan lehiatuko da: maiatzaren 16an, 400 m. libre proba; maiatzaren 18an, 100 m. tximeleta proba; maiatzaren 19an, 100 m. libre proba eta azkenik, maiatzaren 21ean, 200 m. lau estilo proba.