Argentinara bidaian joan dira ikus-entzuleak, besaulkitik mugitu gabe, Irungo hari orkestrako errepertorioarekin. Brian Balmagesen Phantom tangos jo dute, lehenik, eta ondoren, Arturo Cardelúsen Con aire de tango eskaintzeko Marina Beheretche bakarlaria batu zaie. Lau piezek osatutako lanaren lehen erdia amaituta, "bikain, benetan" ari dela oihukatu dio ikusle batek, txaloak isiltzean. Besoarekin garaipen keinua egin, eta pozik hartu du biolinistak lorea. Gainerakoei ere gustatu zaiela argi gelditu da Astor Piazzollaren Oblivion bisa bukatu eta oholtza utzi aurretik jaso duen txaloaldia ikusita.
Ordutik aurrera, Oiasso Kameratako hamabost musikariek bakarrik jarraitu dute. Isaac Albenizen Tango en RE, Alberto Williamsen Hueya, Carlos Guastavinoren Romance en Colastiné, Piazzollaren LIertango, Aldemaro Romeroren Fuga con pajarillo eta The Police taldearen El tango de Roxanne obrek osatu dute programa.
