COVID-19

Bederatzi kutsatu berri erregistratu dituzte Lasarte-Orian

Osakidetzak eta Eusko Jaurlaritzako Osasun Sailak zabaldutako datu epidemiologikoen arabera, ostegunean, bederatzi kasu diagnostikatu dituzte herrian, bezperan zenbatutakoak baino lau gutxiago. Azken hamalau egunetako intzidentzia-tasa metatuak pixka bat gora egin du eta 698,35 da. Amaitzear den hilabete honetan 231 kutsatze baieztatu dituzte Lasarte-Orian.

Beterri-Buruntzako sei udalerrietan 36 kasu diagnostikatu dituzte ostegunean: hamaika, Hernanin; bederatzina, Usurbilen zein Lasarte-Orian;  lau, Andoainen; bi, Astigarragan, eta bakarra, Urnietan. Eskualde osoak eremu gorrian jarraitzen du eta Andoainen izan ezik, intzidentzia-tasa metatuak 400etik urruti daude.

Euskal Autonomia Erkidegoari dagokionez,  atzo, 11.017 test diagnostiko egin zituzten eta haietako 808 positiboak izan ziren. Kutsatze berri horien lurraldekako banaketa honakoa da: 349 atzeman dituzte Gipuzkoan; 368, Bizkaian; eta 83, Araban. Gainerako zortzi kasuak EAEtik kanpo bizi diren pertsonak dira. 

Ostegunean, COVID-19ak eragindako 96 lagun ospitaleratu zituzten Osakidetzako erietxeetan eta 189 gaixo daude ZIUetan, bezperan baino hiru gutxiago.