2KN tabernako Aitor Salegik euskaraz irakurri du idatzia. Bertan esandakoaren arabera, ostiralean Aldundiaren egoitza aurrean gertatutakoari "onartu ezinezkoa" deritzote. Jasaten ari diren kriminalizazioarekin batera, salatu dituzte poliziaren jarrera, EAEko nahiz Espainiako gobernuen "pasibotasuna" eta ezarri dizkieten neurriak.
Hori guztia euren negozioak itxi eta familia askoren hondamena eragiten ari da. Gogoratu dutenez, urtebete daramate egoera honi ahal bezala aurre egiten eta etorkizunari dagokionez ez dira batere baikor.
Beste behin berretsi dute ostalaritza ez dela "birusa" ezta "gizartearen aurrean hori guztia justifikatzeko aitzakia" ere; eta horren aurrean eskaera egin dute: diru laguntzak, erruduntzat ez erabiltzea eta baldintza duinetan lan egiten uztea.