Okendo zinema taldeak euskal dokumentalen bigarren jardunaldia antolatu du. Jardunaldi honetako lehen saioan, Non dago Mikel? dokumentala ikusi ahalko da eta Miguel Angel Llamas 'Pitu' zuzendariarekin solastu ahlko dira ikusleak. Sarrera, 5,50 euro. Jatorrizko hizkuntza eskainiko da gaztelaniazko azpidatzizkiekin.
Non dago Mikel? dokumentalak Mikel Zabalza nafar gaztea desagertu zeneko kontakizuna egiten du.
1985ean, Guardia Zibilak ETAko militante batekin nahasi eta atxilotu zuen.
Zabalza desagertuta egon zen 20 egun horietan, bertsio ofizialak eragindako mesfidantzak bultzatuta jokatu zuen euskal gizarteak eta bizirik aurkitzeko esperantza ahuldu ahala, Euskal Herriko kaleetan oihu bat adituko zen gero eta ozenago: 'Non dago Mikel?'
Bere gorpua azkenean Bidasoa ibaian agertu zenean, protesta ugari egin eta eztanda sozial handiak egon ziren.
Zabalza torturatuta hil zela uste zuen jendeak oro har, baina inoiz ez zuten inor ez epaitu ez zigortu. 2020ko azaroan 35 urte bete dira Zabalza hil zenetik, eta bere familiak egia jakin nahian jarraitzen du.
Azken asteetan Mikel Zabalzaren kasua puri-purian egon da bere desagertzeari buruzko audio batzuk argitara atera baitira.